Un jour ma Sainte au temple saint oroit.
Au ciel estoit le bruit de son silence,
Comme un Soleil reluisoit sa presence,
Et tout le lieu de son ombre doroit.
L’image en Croix de cil qu’elle adoroit,
Signes monstroit de grand’ benivolence
Saintes et Saints luy faisoient reverence,
Et tout le temple honoré l’honoroit.
Ce que j’en dy n’est pas nouvelle sceue
Par rapport d’autre, et n’en suis inventeur :
Car de mes yeux j’ay la chose apperceue.
Que si je suis oultre mon gré menteur,
Et que ma veuë en cela soit deceue,
Tu es, Amour, un terrible enchanteur.
